Posta bidezko botoa. Jarraibideak Nork ematen ahal du botoa posta bidez?

Ondokoek eskatzen ahal dute posta bidezko botoa martxoaren 14ko hauteskundeetarako: boto eskubidea zein herritan duten, egun horretan herri hartatik kanpo egonen direnek, eta orobat, botoa ematera joaterik ez dutenek eri edo ezindurik daudelako, bai eta atzerrian bizi diren nafarrek ere.
Noiz eskatu

Noiz eskatu

Martxoaren 4tik aitzina ematen ahal da posta bidezko botoa.

Non eskatu

Postetxe guztietan eskatzen ahal da inprimakia posta bidezko botoa emateko, Nortasun Agiri Ofiziala, pasaportea edo gidabaimena aurkeztuta. Inprimakia bete, sinatu eta postetxean bertan aurkeztuko da, Zentsuaren Bulegora bidal dezaten.


Eri edo ezindurik daudenak


Boto-emailea eri edo ezindurik dagoelako ezin bada botoa ematera joan martxoaren 14an, ahalorde berezia eman beharko dio beste norbaiti, eta horrek eginen ditu tramite guztiak. Pertsona batek boto-emaile bakar baten ahalordea hartzen ahal du.
Notarioak egin beharko du ahalordea, dohainik, eta osasun egiaztagiria erantsiko zaio, eritasuna edo ezintasuna egiaztatzeko.
Ordezkariak, ahalordea hartu duenak alegia, notario-ahalordea eta osasun egiaztagiria eramanen ditu postetxera eta botoa posta bidez emateko eskaera eginen.


Botoa emateko agiriak noiz jasoko


Zentsuaren Bulegoak ondoko agiri guztiak bidaliko ditu posta ziurtatuaren bidez, hautesleak adierazitako helbidera bidali ere: Hauteskunde Zentsuko inskripzioaren egiaztagiria; alderdi guztien boto-txartel zuriak eta kartazala; sepia koloreko boto-txartelak, senaturako hautagai guztiekin eta beste kartazal bat; eta hirugarren kartazal bat, Hauteskunde Mahaiari zuzendua.
Agiriak banatzera joan eta interesatua etxean ez badago, ez zaizkio beste inori emanen.


Zer egin beharko du posta bidezko boto-emaileak


Botoa zein alderdiri eman nahi zaion, alderdi horren boto-txartela aukeratu beharko da eta kartazal zurian sartu.
Senaturako izangaien izenetan gurutzea jarri behar da, gehienez ere hiru aukeratuz, eta sepia koloreko kartazalean sartu.
Kartazal handian sartu beharko dira bi kartazalak eta zentsuaren egiaztagiria, Hauteskunde Mahaiaren helbidea jarri eta igorlea nor den adierazi. Osasun egiaztagiria, ordea, ez da bertan sartu behar. Azkenik, postetxera eraman beharko da martxoaren 10a baino lehen, posta ziurtatuaren bidez bidaltzeko.