Nola erabaki zenuen politikan sartzea?   Egia erran, ez da “ohiko” pausoa, baizik eta gugan poza sortu duen proiektuari laguntzeko modua da eta, proiektu horrek lanerako gogoa sortu du nafar aunitzengan. Nafarroa Baiz ari naiz, alegia. Eta dut kazetaritza betiko utzi nahi, itzuliko bainaiz. Baina, orain lan egin beharra dago fronte demokratikoaren eraketan, Nafarroatik erantzuna eman ahal izateko eskuinak ekarri duen inboluzioari. Eta inork gutxik egin die kontra.   Kazetariak lan egin dezake politikari gisa? Bertze galdera baten bidez erantzunen nuke: gure gizarteko herritar xeheak parte hartu al dezake parlementuko eztabaidan? Bai, jakina. Baina, pentsamendu bakarraren presioa izugarria da, eta, horrek eraginik, buru barnean sartu zaigu hori ezinezkoa dela gutariko batzuontzat.Gauzak ongi egin behar dira, noski, eta, nik ez nuen zalantzarik izan “mikroa” ganbaran sartzeko Nafarroa Bairen proiektuari heldu nion une berean. Eta ni, egia erran, aunitzez ere gehiago kezkatzen naute kazetaritzaz baliatzen direnek alderdi zehatzen aldeko politika egiteko, eta inori ez zaio kolorerik agertzen. Eta ez dira gutxi gero...   Zertan berritu duzue abertzaletasunaren mezua? Hau adostasunean eta elkarren arteko lanean oinarritutako koalizioa, proiektua da. Badira alderdi abertzale abertzaleakbeste batzuk erosoago daude euskaltzaletasunaren ildoan, gure historia eta kultura aintzat hartzen dutenak aldarrikapen nazionalistari heldu behar izan gabe. Horixe baita berrikuntza nagusia, hau da, bakoitzak bere pentsamoldeari uko egin gabe, bada lanerako ildo bateratu bat, fronte demokratikoaren aldeko jarrera eta Nafarroa errealaren aldeko aldarrikapena. Hori da gure irudia, eta, aurrean zer dago? Ba Madrilgo eskuinak ematen duen irudi zuria, batere eduki sozialik ez duena.   Nola uztartu daiteke ezkerra eta abertzaletasuna? Mundu mailako aldarrikapenak ere inguru hurbila hartu behar du oinarrian. Hau da, globalizazioari aurre eginen badiogu, hurbilekoa irmo defendatu beharra dago; bertzenaz, zaila izanen da liberalismo basatiari aurre egitea eta, ez dugu ahaztu behar, liberalismo hori internazionalizazioaz baliatu dela ahulenei eraso egiteko.Bide berriak urratu behar ditugu, eta nire ustez, Nafarroa Baikoa bezalako apustuak bide onetik doaz.   Eta boto baliogarriarena? Borroka hori alderdien esku uzten dut, eta ikusiko duzu nola entzunen dugun kanpainan; bereziki Nafarroan, pertsona bat baino gehiago beldur baitago Nafarroa bairen agerpena dela eta.Nik nahiago dut botoaren erabilgarritasuna gogoratzea, eta orain badago Nafarroak Madrilen duen irudi zuria hausteko aukera, irudi koloregabea baita kulturan, eta, zer erranik ez, arlo sozialean.   Baina merezi al du Madrilen egotea? Bai, jakina! Eta ez da batere erraza izanen; jadanik jende asko senetik ateratzen hasi da badakielako martxoaren 15eko titularrek erranen dutela Nafarroan hautsi dela UPN-PSN frontea eta badela gutxiengo sendo bat –edo ez horren gutxiengoa- mezu aurrerazalea, abertzalea eta euskaltzalea eramanen duena.Eta egun horretan, gu hasiko gara errealitate horren ahotsa izaten.   Zein taldetan? Mistoan bada lan egiteko aukera: guk Nafarroako ahots aurrerazalea eta abertzalea eramanen dugu. Eta, jakina, zinez erran dezakegu guri ez digula inork ere inposatuko nafarren agindua bazter uztea, Kongresuan Koalizio Kanaria taldea eratzeko. Bertze batzuek, halakorik ere ezin dute erran...   Eta zer diozu beste taldeekiko elkarlanaz?   Hori funtsezkoa da. Talde ezkertiar eta aurrerazaleekin, eta Estatuko herrien defentsa argia egiten dutenekin. Izan ere, inposizioa nagusi izan den Ganbera honi baliteke gutxiengo erreibindikatiboak protagonista izanen dituen Kongresua jarraikitzea, oposizioa egiteko benetako ahalmena izanen duena.   Nori kenduko dio jarlekua Nafarroa Baik?   Martxoaren 14an jarlekuak herritarrenak dira eta hori politikariek ahaztu egiten dute, eta nafarrek erabakiko dute beren ordezkaritza. Egia da UPNk ikusarazi nahi duela PSNk galduko lukeela bere jarlekua, baina historiak dio hauteskunde fronte hori hautsi den bakoitzean eskuin nafarraren bizkar joan dela.   Zer diozu koalizioa eratzen duten alderdiez?   Haiek izan dira koalizioaren sustatzaile nagusiak: Aralar, Eusko Alkartasuna, Eusko Alderdi Jeltzalea eta Batzarre taldeek maila eman dute: eskuzabaltasunez eta ausardiaz jokatu dute nafar aunitz aspaldian egiten ari ginen eskariari aldeko erantzuna emateko. Eta egoera ilusionagarria lortu dute benetan, oinarrizko printzipioak adostu dituzte, benetako mamia dutenak, eta martxoaren 14tik aitzinera nafar askok gure burua ordezkatua ikusiko dugu oinarri horiekin. Eta gustatzen zait kanpainarako aukeratu dugun leloa, bai horixe: hauteskunde orokorretan luzaro ikusle hutsak izan gara, baina Orain da geroa!